Chickpea MSP 2026 : शेतकरी मित्रांनो, रब्बी हंगाम आता अंतिम टप्प्यात आला आहे आणि अनेक ठिकाणी हरभरा काढणीला वेग आला आहे. बाजारात सध्या हरभऱ्याला म्हणावा तसा भाव मिळत नसल्याने तुम्ही चिंतेत असाल, तर तुमच्यासाठी एक दिलासादायक बातमी आहे. राज्य सरकारने हरभऱ्याची हमीभावाने (MSP) खरेदी करण्यासाठी हिरवा कंदील दाखवला असून, त्याची नोंदणी प्रक्रिया लवकरच सुरू होत आहे. आजच्या या ब्लॉगमध्ये आपण जाणून घेऊया की ही नोंदणी कधीपासून सुरू होणार आहे, हमीभाव किती मिळणार आहे आणि त्यासाठी कोणते कागदपत्रे तयार ठेवावी लागतील.
बाजारातील भाव vs हमीभाव: मोठा फरक
सध्या आपण बाजारातील स्थिती पाहिली तर हरभऱ्याला खाजगी व्यापाऱ्यांकडून सरासरी ४,७०० ते ४,८०० रुपये आणि जास्तीत जास्त ५,३०० रुपयांपर्यंत भाव मिळत आहे. मात्र, सरकारने या वर्षासाठी हरभऱ्याचा हमीभाव ५,८७५ रुपये जाहीर केला आहे.
म्हणजेच, जर तुम्ही तुमचा माल हमीभाव केंद्रावर विकला, तर तुम्हाला बाजारापेक्षा क्विंटलमागे ५०० ते १००० रुपयांचा अधिक फायदा होऊ शकतो. त्यामुळे ही संधी नक्कीच हातची जाऊ देऊ नका.
नोंदणी कधी आणि कुठे करायची?
शासनाच्या या निर्णयानुसार, हरभरा विक्रीसाठी ऑनलाइन नोंदणी १ मार्च २०२६ पासून सुरू होणार असून ती ३१ मार्च २०२६ पर्यंत चालणार आहे.
तुम्ही ‘ई-समृद्धी’ (e-Samridhi) पोर्टलवर किंवा सध्या सुरू असलेल्या तुरीच्या हमीभाव खरेदी केंद्रांवर जाऊन आपली नोंदणी करू शकता.
येथे वाचा – खरीप पीक विमा २०२५ वाटपाला अखेर मुहूर्त? कृषिमंत्र्यांचे तातडीचे आदेश
शासनाचा खरेदीचा लक्षांक किती?
यंदा राज्यात हरभऱ्याची लागवड मोठ्या प्रमाणावर झाली आहे आणि उत्पादनही बंपर येण्याची शक्यता आहे. हे लक्षात घेऊन केंद्र सरकारने राज्यातून ७ लाख ६१ हजार मेट्रिक टन हरभरा खरेदी करण्याचे उद्दिष्ट ठेवले आहे. सामान्यतः एकूण उत्पादनाच्या २० ते २५ टक्के माल हमीभावाने खरेदी केला जातो, त्यामुळे लवकरात लवकर नोंदणी करणे फायद्याचे ठरेल.
नोंदणीसाठी आवश्यक कागदपत्रे
नोंदणी करण्यासाठी खालील कागदपत्रे आजच तयार ठेवा:
१. ७/१२ उतारा (ज्यावर हरभरा पिकाची ‘ई-पीक पाहणी’ नोंद असणे आवश्यक आहे).
२. आधार कार्ड
३. बँक पासबुक (तुमचे आधार लिंक असलेले खाते).
येथे वाचा – हरभऱ्याच्या भावात मोठी घसरण; पहा तुमच्या बाजारपेठेतील दर
महत्वाचा सल्ला:
मित्रहो, १ मार्चपासून पोर्टल सुरू होताच वेळेवर नोंदणी करा. कारण बऱ्याचदा उद्दिष्ट पूर्ण झाले की पोर्टल बंद होऊ शकते. त्यामुळे शेवटच्या तारखेची वाट न पाहता, आपली कागदपत्रे घेऊन जवळच्या केंद्रावर संपर्क साधा आणि या योजनेचा लाभ घ्या.
येथे वाचा – बळीराजासाठी खुशखबर! कांदा निर्यात सबसिडी लागू
